Унгар Улсын Будапешт хотын Корвинус Эдийн Засгийн Их Сургуулийг дүүргэсэн тэрээр Монголын Хөрөнгийн Биржээс 1991 онд хөдөлмөрийн гараагаа эхэлж, Монголбанкинд хянан шалгагчаар оржээ. 1998 онд НҮБ-ын бичил санхүүгийн Микростарт төсөл дээр Санхүүгийн менежерээр шалгаран ажиллаж байгаад 1999 онд Монголын анхны банк бус санхүүгийн байгууллага болох Хөгжлийн Алтан Сан (ХАС)-г байгуулан Гүйцэтгэх захирлаар томилогдсон юм.

ХАС нь бичил зээлийн үйл ажиллагааг амжилттай явуулсаар 2001 онд Говийн Эхлэл ББСБ-тай нэгдэж, өнөөгийн ХасБанк байгуулагдсан юм. Ч.Ганхуяг нь ХасБанк байгуулагдсан цагаас хойш 2009 оныг хүртэл Гүйцэтгэх захирлаар ажилласан бөгөөд 2009-2010 онд ХасБанкны толгой компани болох ТэнГэр Санхүүгийн Нэгдлийн Гүйцэтгэх захирал, 2010-2012 онд Монгол Улсын Сангийн Дэд сайдаар тус тус ажиллаж байв. Тэрээр Унгар улсын өргөмжит консул, Монголын Эдийн Засгийн Форумын санаачлагч, Ерөнхий нарийн бичгийн дарга, Монголын Оюутны Холбооны Ерөнхийлөгч, Олон Улсын Бичил Санхүүгийн Төвийн УЗ-ийн гишүүн, Монголын Сагсан Бөмбөгийн Холбооны Ерөнхийлөгч гэх мэт албан тушаал хашиж байснаас гадна Монгол Улсад анхлан хадгаламж зээлийн хоршооны хөдөлгөөнийг 1990-ээд оны сүүлээр эхлүүлж байжээ. 2009 онд Дэлхийн Эдийн Засгийн Форумаас түүнийг Дэлхийн Залуу Манлайлагчаар өргөмжилсөн байна. Мөн Улаанбаатар Хотын Худалдааны Танхимын Ерөнхийлөгчийн сонгуульт ажлыг давхар хашдаг. Ч.Ганхуяг нь Ард Санхүүгийн Нэгдэл ХК–ийн үүсгэн байгуулагч бөгөөд тус компанийн Гүйцэтгэх захирлаар ажиллаж байна.

Жаргалангийн Алтангүний нь Ард Санхүүгийн Нэгдлийн Үйл Ажиллагаа Эрхэлсэн Захирлаар 2015 оноос ажилласан бөгөөд 2021 оноос Төр Засаг, Олон Нийтийн Харилцаа Эрхэлсэн Захирлаар ажиллаж байна. Тэрээр ажлын гараагаа Х.А.С (Хөгжлийн Алтан Сан) ТББ-ийн зохицуулагчаар эхэлж, АйКонсепт ХХК-д ерөнхий зохицуулагч, Монголын эдийн засгийн форум ТББ-ын Үйл Ажиллагаа Хариуцсан Захирлаар тус тус ажиллаж байжээ.

Mongolia International University буюу Монголын олон улсын их сургуулийг олон улсын менежментээр бакалаврын зэрэг, Тайваны засгийн газрын тэтгэлгээр Тайваны Үндэсний Шинжлэх Ухааны их сургуулиас Бизнесийн удирдлагын магистрын зэрэг тус, тус эзэмшсэн. Тэрээр ажил мэргэжлийнхээ хажуугаар нийгэмд хандсан үйл ажиллагаанд идэвхтэй оролцдог. 2006 оноос хойш олон улсын Ротари хөдөлгөөний Ротаракт клубийн гишүүн бөгөөд 2010-2011 онд МУИС-ын Ротаракт клубийн ерөнхийлөгчөөр ажиллаж байсан. Түүнчлэн Дэлхийн Эдийн Засгийн Форумын дэргэдэх Глобал Шэйпэрс нийгэмлэгийн гишүүн, Улаанбаатар Глобал Шэйпэрс нийгэмлэгийн удирдах зөвлөлийн гишүүн юм.

Б.Оюутцэцэн нь Их Британий Лондон хотод санхүү, нягтлан бодох бүртгэлээр магистрын зэргээ хамгаалж, 2020 онд ACCA буюу Олон Улсын Мэргэшсэн Нягтлан бодогч зэргийг хүртсэн.

Бакалаврт суралцаж байх хугацаандаа Монинжбар ХК-д туслах нягтлан бодогчоор ажиллаж байсан ба 2017- 2020 оны хугацаанд БДО Олон улсын аудитын фирмд аудитороор, Голомт банкны Нөөцийн удирдлагын газарт түүхий эдийн дилерээр ажилласан туршлагатай.

Г.Сүхбаатар нь Банк санхүүгийн салбарт 17 жилийн туршлагатай нэгэн бөгөөд ажлын гараагаа Эрдэнэт хотын Эрүүл Мэндийн Газарт Санхүү, эдийн засаг хариуцсан орлогч даргаар эхэлж улмаар ХасБанк-д Эдийн засагч, Салбарын захирлаар 11 жил, Ард Кредит ББСБ ХК-нд Эдийн засагч, Стратеги Бодлого Төлөвлөлт Эрхэлсэн захирлаар 5 жил ажиллаж байсан.

Тэрээр 2021 оны 3 сараас эхлэн Ард Лизинг ХХК-н Гүйцэтгэх Захирлаар ажиллаж байна.

Нягтлан бодох бүртгэлийн чиглэлээр МУИС-д бакалаврын зэрэг, мөн Бизнесийн удирдлагын чиглэлээр мастер цол хамгаалжээ.

Ганхуяг овогтой Билгүүн нь 2017 оны 8 сараас эхлэн Ард Актив хадгаламж, зээлийн хоршооны (ХЗХ) гүйцэтгэх захирлаар томилогдон ажиллаж байна.

2013 онд Санхүү Эдийн Засгийн Дээд сургуулийг Нягтлан бодогч мэргэжлээр төгссөн. 2013 - 2016 онуудад арилжааны банкинд зээлийн мэргэжилтэн, 2016 - 2017 онд Ард Секюритиз ҮЦК-д санхүүгийн шинжээчээр ажилласан туршлагатай.